نن جمعه د جنورۍ ۲۴ مه نېټه د زده کړو له نړیوالې ورځې سره سمون خوري.
یوناما د دې ورځې په مناسبت په خپله اېکس پاڼه کې د یوې پیغام په خپرولو سره یوځل بیا له زده کړو څخه د محرومو افغان نجونو د وضعیت په اړه اندیښنه څرګنده کړې ده.
یوناما په خپل پیغام کې ویلي دي چې ۱۲۲۵ ورځې کیږي چې طالبانو له ۱۲ کلونو څخه پورته نجونې له زده کړو منع کړي دي.
په دې پیغام کې د افغانستان لپاره د ملګرو ملتونو د عمومي منشي د ځانګړې استازې او د یوناما مشرې روزوا اوتنبایوا په حواله ویل شوي دي چې د زده کړو له حق څخه د میلیونونو افغان نجونو منع کول یوه لویه غمیزه ده.
دا په داسې حال کې ده چې طالبانو د جمهوریت له سقوط وروسته د خپلې واکمنۍ په پیل کې د نجونو پر زده کړو پرامخ محدودیتونه ولګول.