د امریکا ولسمشر ډونالد ټرمپ ویلي چې د ایران له مذهبي مشر علي خامنهاي سره د اټومي تړون په اړه د خبرو لپاره نوموړي ته یو لیک استولی دی.
د رویټرز خبري اژانس د راپور له مخې، ټرمپ د جمعې په ورځ له فاکس بیزنس شبکې سره په یوه مرکه کې ویلي هیله لري چې ایران مذاکره وکړي، ځکه د هغه په باور دا د دې هېواد لپاره تر ټولو غوره انتخاب دی.
نوموړي زیاته کړه: «بله لاره دا ده چې موږ باید یو اقدام وکړو، ځکه موږ نشو کولی چې بل اټومي وسلوال هېواد وزغمو.»
ایراني چارواکو تر اوسه د ټرمپ دې څرګندونو ته رسمي غبرګون نه دی ښودلی.
دا په داسې حال کې ده چې په دې ورستیو کې د ایران مذهبي مشر امریکا سره هر ډول خبرې اترې رد کړې وې.