د شانګهای همکارۍ سازمان سرمشریزه د دوشنبې په ورځ د قرغزستان په پلازمېنه بیشکک کې پیل شوه، خو د طالبانو استازي ته په دې غونډه کې د ګډون بلنه نه ده ورکړل شوې.
افغانستان له ۲۰۱۲ کال راهیسې د شانګهای همکارۍ سازمان رسمي څارونکی غړی دی، خو د طالبانو له بیا واکمنېدو وروسته یې د دغه سازمان په کلنیو سرمشریزو کې ګډون نه دی کړی.
تمه کېږي چې د غونډې په امنیتي بحثونو کې د افغانستان وضعیت، د ترهګرۍ ګواښ، په ځانګړي ډول د داعش فعالیتونه، او د نشهيي توکو قاچاق مهم موضوعات وي.
د سرمشریزې په لومړۍ ورځ د غړو هېوادونو ترمنځ دوه اړخیزې او څو اړخیزې ناستې ترسره کېږي، او د هېوادونو د مشرانو اصلي غونډه به د سېشنبې په ورځ جوړه شي.
په غونډه کې د چین ولسمشر شي جینپینګ، د روسیې ولسمشر ولادیمیر پوتین، د هند لومړی وزیر نرندرا مودي، د ایران ولسمشر مسعود پزشکیان، د پاکستان لومړی وزیر شهباز شریف او د سیمې د یو شمېر نورو هېوادونو مشران ګډون لري.
د ملګرو ملتونو عمومي منشي انتونیو ګوتریش او د ترکیې ولسمشر رجب طیب اردوغان هم د غونډې له ګډونوالو څخه دي. ترکیه د شانګهای همکارۍ سازمان د خبرو اترو شریک هېواد دی.
د امنیت ترڅنګ، اقتصادي او سوداګریزې همکارۍ، انرژي، ټرانسپورټ او سیمهییز اتصال هم د سرمشریزې د بحثونو مهمې برخې دي.
په افغانستان کې د وسلهوالو ډلو د فعالیت په اړه اندېښنې له اوږدې مودې راهیسې د شانګهای سازمان د غړو هېوادونو د امنیتي بحثونو برخه ده. د پاکستان او ایران چارواکو هم په تېرو ناستو کې د افغانستان له خاورې د ترهګرۍ د ګواښ او د یوه باثباته افغانستان پر اړتیا ټینګار کړی و.
ټاکل شوې د سرمشریزې په پای کې د شانګهای همکارۍ سازمان د جوړېدو د ۲۵مې کلیزې په مناسبت «بیشکک اعلامیه» تصویب شي او قرغزستان د سازمان دورهیي مشري پاکستان ته وسپاري.