د طالبانو پخواني غړي او د جمهوري دولت د حج او اوقافو پخواني وزیر محمد قاسم حلیمي هغه راپورونه رد کړي چې ګواکې نوموړي له امریکا د سولې له انسټیټوټ څخه شخصي ګټه پورته کړې. ښاغلي حلیمي ویلي، چې یاده پیسه د قانوني قرارداد له مخې ورکړل شوې ده.
ایلن ماسک ادعا کړې چې د امریکا د سولې انسټیټوټ په تېرو لسو کلونو کې ۱۳ میلیونه ډالر د بیلابیلو اشخاصو شخصي مصارفو ته ورکړي، چې پکې حلیمي ته ورکړل شوې ۱۳۲ زره ډالر هم شامل دي.
خو قاسم حلیمي په خپله فیسبوک پاڼه لیکلي: “دوی ماته د اسلام او سولې د پروګرام لپاره د رسمي کار وړاندیز کړی و، یو کال مې ورسره کار وکړ او دغه اندازه پیسې د کار د حقالزحمې په توګه راکړل شوې. نه مې کومه غلا کړې، نه پټه معامله کړې.”
نوموړي زیاته کړې چې دا پیسې د یو رسمي قرارداد له مخې ورکړل شوې، چې وروسته په ۲۰۲۵ کال کې د ماسک ادارې له لوري لغوه شوی. هغه ویلي چې اوس یې د ماسک ادارې پر ضد حقوقي دعوه هم کړې ده.