د بشري حقونو د څار سازمان (هیومن رایټس واچ) وایي، چې په افغانستان کې ښځې او نجونې له سختو محدودیتونو سره مخ دي.
دغه نړیوال سازمان نن جمعه د مارچ مېاشتې په ۷ مه نېټه د یو راپور په خپرولو سره ویلي دي چې طالبانو په افغانستان کې د ښځو او نجونو پر وړاندې محدودیتونه لا سخت کړي دي او هغوئ یې له ټولنې جلا کړې دي.
د دې سازمان په راپور کې راغلي چې افغان مېرمنې د طالبانو له محدودیتونو سره د مبارزې لپاره یوه نړیواله هڅه رهبري کوي، څو د جندر اپارتاید د بشر ضد جنایت په توګه وپېژندل شي.
په راپور کې زیاته شوې چې یو شمېر هېوادونه پر طالبانو فشار زیاتوي، څو د ملګرو ملتونو د ښځو پر وړاندې د تبعیض د ختمولو کنوانسیون (CEDAW) څخه سرغړونه ودروي.
دا په داسې حال کې ده چې طالبانو په تېرو شاه و خوا څلورو کلنو کې پر افغان ښځو او نجونو خورا سخت محدودیتونه ولګول او ان هغوئ یې له خپلو اساسي حقونو بې برخې کړل.