د افغانستان لپاره د ملګرو ملتونو د بشري حقونو ځانګړي راپور ورکوونکي، ریچارد بینټ، د طالبانو له حکومت څخه غوښتي چې ژر تر ژره د ښځو او نجونو پر وړاندې ټول محدودیتونه لرې کړي.
ریچارد بینټ په خپله اېکس پاڼه کې ویلي دي چې دوی یوځل له طالبانو غوښتنه کوي چې هر ډول پالیسۍ او کړنې چې د ښځو بشري حقونو او ازادیو خنډ ګرځي، په چټکۍ سره لغوه کړي.
نوموړي د امنیت شورا د هغو غړو هېوادونو پرېکړه ستایلې چې د طالبانو د امر بالمعروف قانون د لغو کولو غوښتنه یې کړې ده.
په ورته وخت کې، د ملګرو ملتونو د امنیت شورا یو شمېر غړو د جمعې په ورځ، د سپټمبر ۶ مه نېټه، په ګډه اعلامیه کې پر طالبانو غږ کړی چې د بشري حقونو او اساسي ازادیو درناوی وکړي.
په دغه اعلامیه کې د اکوادور، فرانسې، ګویانا، مالټا، موزمبیق، سویلي کوریا، سیرالیون، سلووینیا، سویس، بریتانیا، امریکا، او جاپان استازو ګډون کړی دی.