د امریکا د نیو مکسیکو یوې ایالتي محکمې د فیسبوک او انسټاګرام مالک شرکت، میټا، ته د ماشومانو او تنکیو ځوانانو د خوندیتوب په یوه مهمه قضیه کې د ۵۶۷ میلیونه ډالرو د ورکړې امر کړی دی.
محکمې ویلي چې د میټا د ټولنیزو شبکو ځینې ځانګړتیاوې د ماشومانو او تنکیو ځوانانو لپاره زیانمنې تمامېدای شي او هغوی د ذهني روغتیا، انلاین ځورونې او نورو خطرونو سره مخ کوي.
د محکمې د پرېکړې له مخې، د ۱۸ کلونو څخه کم عمره کاروونکو لپاره به پر ځینو ځانګړتیاوو محدودیتونه هم ولګول شي. په دغو اقداماتو کې د ښوونځي پر مهال د ځینو اعلانونو محدودول او د لایکونو د شمېر د ښکاره کولو مخنیوی شامل دی.
همداراز، د کم عمره کاروونکو لپاره د فیسبوک او انسټاګرام د استعمال د وخت د محدودولو لپاره هم اقدامات مطرح شوي دي.
دا قضیه د ماشومانو او تنکیو ځوانانو پر ذهني روغتیا د ټولنیزو شبکو د اغېزو په اړه د زیاتېدونکو اندېښنو په ترڅ کې مطرح شوې ده.
میټا د محکمې له پرېکړې سره مخالفت څرګند کړی او ویلي یې دي چې د حکم د بیاکتنې لپاره به استیناف وکړي.