د ملګرو ملتونو د بشري مرستو د همغږۍ دفتر اوچا خبر ورکړی دی چې په افغانستان کې د بشري مرستو لپاره یې ۴۸۰۵ میلیونه ډالر ځانګړې دي.
په افغانستان کې د اوچا مشر اندریکا راتوته ویلي دي چې دغه پیسې د دې سازمان اضطراري صندوق او د افغانستان بشري صندوق د بېړنیو بشري مرستو لپاره ځانګړې شوې دي.
اندریک راتوته څرګنده کړې چې دغه مرستې به د افغانانو بېړنیو اړتیاوو ته د ګډ ځواب ویلو په موخه مصرف شي
د اوچا مشر زیاته کړې چې د لسیزو جګړو، فقر او اقلیمي بدلونونو له امله د افغانستان خلک اوس مهال د مرستو له کمښت سره مخ دي او نړیواله ټولنه باید دې بحران ته ځانګړې پاملرنه وکړي.
دا په داسې حال کې ده چې تر دې وړاندې هم یوشمېر نړیوالو سازمانونو په افغانستان کې د بشري مرستو د کمښت له امله خپله اندیښنه څرګنده کړې وه.