د افغانستان د پخواني حکومت د جمهوري ریاست د چارو د ادارې رئیس، فضل محمود فضلي، ویلي چې امریکا له طالبانو سره د سیاسي توافق له مخې واک دغې ډلې ته وسپاره. نوموړي له دویچه ویله سره په ځانګړې مرکه کې د واک د انحصار تورونه رد کړل او ټینګار یې وکړ چې د اشرف غني په حکومت کې ټول سیاسي مشران د واک برخه‌وال وو.

فضلي زیاته کړه چې د طالبانو پر ضد د وسله‌والو جبهو جوړېدل او د افغان سیاسي څېرو غونډې به افغانستان ته سوله او ثبات را نه ولي. نوموړي وویل: “د افغانستان ستونزه یوازې د خبرو او تفاهم له لارې حل کېدای شي، نه د جګړې او بېلوالي له لارې.”

د چارو د ادارې پخواني مشر وویل چې د طالبانو سره د سولې خبرو ته تلونکی پلاوی د دوی په خوښه نه و، بلکې دا پرېکړه د امریکا له لوري شوې وه.